Bio - Bobby van Jaarsveld

Bobby van Jaarsveld het die musiekbedryf betree aan die begin van sy matriekjaar toe sy eerste solo cd uitgereik is deur Bler Musiek.

Bobby se talent het nie ongesiens verbygegaan nie en in 2006 is hy 3 keer as Beste Nuweling genomineer. Dit was ‘n Kanna nominasie by KKNK, ‘n nominasie deur die Vonk tydskrif en ook ‘n nominasie deur Huisgenoot. Bobby het die Huisgenoot Tempo toekenning by Skouspel 2006 vir Beste Nuweling gewen. Dit was vir hom ‘n groot eer om as een van die uitgesoekte kunstenaars, wat by Skouspel 2007 opgetree het, aangewys te word. Bobby het daarna nog 2 jaar agtereenvolgend by Huisgenoot se Skouspel by Sun City en ook by van Huisgenoot se ander extravaganzas in Kaapstad opgetree.

In November 2006 het Theuns Jordaan Produksies Bobby ‘n platekontrak aangebied. Die cd DUISEND URE kry ‘n splinternuwe baadjie en word heropgeneem met van die bestaande liedjies, maar het ook 3 nuwe liedjies, deur Bobby self geskryf, bygekry. Die cd se verkope het in Maart 2008 Goue Status bereik.

In Mei 2008 het Bobby met sy eie orkes begin optree. Sy unieke en energieke optredes is landswyd deur die gehore geniet. Die verskeidenheid musiek gengres wat hy ook tydens sy vertonings gebruik gee die gehore iets om na uit te sien en verseker dat hulle weer en weer terugkom om ‘n vertoning by te woon.

In Oktober 2009 het Bobby sy tweede solo cd uitgebring – NET VIR JOU. Die cd bevat 13 liedjies – almal uit Bobby se eie pen – wat meesterlik deur Coleske Artists verwerk is. Dit is lekker luister en saamsing liedjies met woorde wat jou bybly. Hierdie album se verkope het binne die eerste 8 weke Platinum Status bereik.